صلاحية البلوكارد لو اشتغلت في المانيا ثما سافرت خارج المانيا ورجعت للعمل مرة اخرى

أنا إشتغلت في ألمانيا من نوفمبر 2016 لمايو 2017 '6 شهور'. كنت مسافر على فيزا بلوكارد وبالفعل لما وصلت بدأت في إجراءاتها مروراً بالتسجيل في البلد، التأمين الصحي والإجتماعي وتأمين التقاعد، الحساب البنكي، الرقم الضريبي، أبليكيشن ال Aufenthaltstitel واللي عملته وأخدت ساعتها فيزا إكستنشن أو ال Fiktionsbescheinigung بحيث أقدر أفضل موجود في البلد لحد ما استلم البلوكارد نفسها.

إستلمت البلوكارد وكانت صالحة لحد ديسمبر 2018 وكملت عادي وفي مايو 2017 كان خلاص شغلي خلص ولازم أرجع مصر لأنها كانت work round بتتراوح بين 6 شهور لسنتين والتيم بتاعي کنا بنسافر واحد ورا التاني ف لو حصل حاجه وحد مش هيقدر يسافر ف اللي مسافر بيكمل. المهم عملت Abmeldung ورجعت مصر كملت شغل في شركتي وبعد 6 شهور في نوفمبر 2017 قدمت إستقالتي وتفرغت للبحث عن شغل في المانيا.

جبت عقد عمل مفتوح في برلين وبدأت أسأل إيه المفروض أعمله عشان أقدر أسافر تاني. سمعت كلام مختلف، حد يقوللي انت كده بقالك بره المانيا 6 شهور ومش هتقدر ترجع تاني خلاص بالبلوكارد اللي معاك ولازم تبدا من اول وجديد وحد يقوللي انت البلوكارد بتاعتك لسه ساريه بس هتحتاج تعمل فيزا دخول للبلد ولما توصل تبقى تروح مكتب الأجانب وتسألهم هتستخدمها إزاي وتربطها بعقد العمل الجديد بتاعك.

عملت انا search بنفسي وجبت أكتر من ويب سايت بيتكلموا عن البلوكارد وصلاحيتها بعد مغادرة ألمانيا وكلهم كانوا بيقولوا إن اللي معاه بلوكارد يقدر يخرج بره المانيا لمده 12 شهر بس لازم يرجع قبل ما يخلصوا ویقدر یدخل من غير ما یحتاج أي فيزا تانيه. جبت ايميل مكتب الهجره وبعتلهم اسالهم عن الموقف وقالولي نفس الكلام. أخدت الباسبور والبلوكارد ورحت سفارة المانيا في القاهره ووقفت قدام السفاره وفضلت اتصل بقسم التأشيرات ومسيبتهومش لحد ما ردوا واللي ردت عليا شرحتلها الموقف وقلتلها انا قدام الشباك بعد اذنك تعالي خدي مني الباسبور والبلوكارد واتاكديلي. فعلا خرجت واخدتهم ودخلت سالت ورجعت قالتلي باسبورك والبلوكارد واحجز طيران وسافر. مش محتاج أي فيزا طالما لسه معداش عليك 12 شهر بره ألمانيا.

طبعت أنا بقا الإيميل بتاع مكتب الهجرة وال pages اللي بتتكلم عن صلاحيه البلوكارد وحطتهم مع ورق سفري "الباسبور والبلوكارد" إحتياطي بحيث لو حصل حاجه في المطار أطلع الورق وايميل مكتب الهجره. والورق ده لما وصلت ألمانيا مكنتش بتحرك من غيره في اي مصلحه.

قرأت المقال اللي على الويكي اللي بيتكلم عن تغيير الشركة في أول سنتين من البلوكارد لأني رايح ع شركة مختلفه ف بديهي جدا اني هحتاج قبل ما ابدا شغل، اغير ال Zusatzblatt اللي بنستلمها مع البلوكارد واللي بتوضح ليه كل واحد مننا معاه بلوكارد 'وجود عقد عمل مع شركه' وبيكون فيها اسم الشركه كمان.

لينك المقال: الاجراءات_المطلوبة_لتغيير_العمل_قبل_سنتين

دخلت على اللينكات اللي في المقال ومليت الأبليكيشنز المطلوب وجهزت كل الورق المطلوب عشان اغير ال Zusatzblatt ورحت عامل scan للورق وبعته بالإيميل لل Ausländerbehörde أو اللي هو Labo Berlin. ردوا عليا وقالولي اني لازم احجز معاد اونلاين ف دخلت لقيت اقرب معاد يوم 10 ابريل ف حجزته احتياطي لحد ما اشوف هقدر اعمل ايه. بعتلهم قلتلهم ان ده اقرب معاد لقيته وان عقد عملي بيبدا يوم 1 مارس واني مسافر المانيا يوم 27 فبراير ومحتاج معاد اقرب بحيث اقدر ابدا في مارس ومتأخرش عن كده.

لينك صفحة خدمة تغيير العمل على موقع مكتب الأجانب في برلين واللي بيوضح مكان المكتب، مواعيد العمل، شرح الخدمة، الأوراق المطلوبة، الـ forms المطلوبة إستكمالها بالبيانات: https://service.berlin.de/dienstleistung/326856/standort/327437/en/

لينك صفحة حجز موعد لتغيير العمل -يرجي قراءة مقال الإجراءات المطلوبة لتغيير العمل قبل سنتين-: https://formular.berlin.de/xima-forms-29/get/14963116144270000?mandantid=/OTVBerlin_LABO_XIMA/000-01/instantiationTasks.properties

إيميل مكتب الأجانب في برلين واللي ممكن تبعت عليه الأوراق المطلوبة وتتابع معاهم طلبك وتعرف إيه مطلوب منك تاني تحضره: [email protected]

كل مره كنت ببعت ايميل كان بيرد عليا موظف مختلف ف قررت في تالت مره اني همسك موظف ابعتله هو بشكل مباشر واحط ايميل مكتب الأجانب في ال CC بحيث يكون شخص واحد عارف انا بتكلم عن ايه. المهم رد عليا قاللي اني هحتاج حاجتين:

1- موافقة مكتب العمل لأن عقد عملي الجديد أقل من ال minimum annual salary الکبیر اللی هو 52,000 یورو ولازم بقا اثبت إني qualified وان الوظيفه اللي انا رايح اشتغلها دي في ال shortage list. ف طلب مني اني ابعتله ال Qualifikationsnachweise بتاعتي اللي هي طلعت ال Qualifications proof. سألت يعني إيه وعرفت إنها عباره عن "شهادة التخرج موثقة، شهادات الخبرة من الشركات السابقة، أي شهادات أو certificates عندی" ف جمعتهم وزودت عليهم ال anabin recognition بتاع الكلية بتاعتي وال CV بتاعي وعملت scan لكل ده وبعتهوله.

لينك موقع anabin اللي من عليه بتقدر تعرف الكلية بتاعتك معترف بيها في ألمانيا وللا لأ: http://anabin.kmk.org/no_cache/filter/institutionen.html

2- إني لازم أسافر وأقعد في سكن في برلين وأعمل Anmeldung وأبعتهوله عشان يقدر يطلب الملف بتاعي من ال Ausländerbehorde بتاعة Offenbach القريبة من فرانكفورت اللي عملت فيها البلوكارد بتاعتي.

لينك الصفحة اللي بتشرح طريقة التسجيل في ألمانيا بعد الوصول أو الـ Anmeldung: تسجيل_الوصول_إلى_ألمانيا

لما بعتله كل الحاجات المطلوبة في أول نقطة رد عليا وقاللي إنه هيبعت الابليكيشن بتاعي ده لمكتب العمل ويستنى الرد اللي هيوصل في خلال إسبوعين وإنه لو جاله رد إيجابي من مكتب العمل واخدت موافقه، هيديلي معاد بدري بالإيميل أروح فيه ونعمل الإجراءات اللازمة وأستلم ال Zusatzblatt الجدیدة.

سافرت وأجرت شقه بس العقد وورقة ال Wohnungsgeberbestätigung أو ال Einzugsbestätigung -اللي هي confirmation من صاحب الشقة أو مستأجر الشقة الرئيسي إنك مقيم في العنوان ده- كانوا بيبدأوا أول مارس ف مش هقدر أعمل Anmeldung ولا أروحله مكتب الأجانب غير في 1 مارس. يوم 1 مارس كان قدامي إختيارين يا إما أروح أعمل registration يا إما أروحله الأول. قررت إني هروحله أشوف هقدر أعمل ايه وعالاقل اعرف رد مكتب العمل ويديني معاد بدري شويه. رحت قعدت اكتر من 5 ساعات عشان مش معايا رقم دخول في اليوم ده طبعا ودخلتله في اخر نص ساعه في اليوم وبشكل ما قدرت أقنعه اني مستعجل وعايز ابدا شغل بسرعه وضروري ف لقيته بيقوللي هات الباسبور والبلوكارد وطلع ورقة Zusatzblatt فاضيه وبيجهزها للطباعه ف بسأله هو رد مكتب العمل جه؟ قاللي ايوه الموافقه جت عندنا. وبعدين سألني انت عملت Anmeldung? قلتله لسه عشان كذا كذا وقررت اني اجيلك الاول ف قاللي طيب لازم الاول تعمل Anmeldung وتبعتهولي وانا هحددلك معاد بالايميل تيجي فيه ونخلص كل حاجة. ودي كانت غلطة مني لأني لو كنت حجزت معاد للـ Anmeldung بدري شوية كنت رحت يوم 1 مارس الصبح بدري جداً عملت الـ Anmeldung وأخدته وروحتله مكتب الأجانب وده كان هينجزني ويخليني أخلص كله في يوم 1 مارس.

خرجت من عنده ودورت ع معاد فاضي في اي Bürgeramt في برلين لقيت في معاد في Bürgeramt Sonnenallee تاني يوم الصبح ف حجزته ع طول ورحت عملت Anmeldung بالباسبور والبلوكارد وال Einzugsbestätigung وشرحت للموظفة إني كنت موجود في فرانكفورت قبل كده وعملت Abmeldung منها ورجعت مصر ودلوقتي انا جي من مصر على برلين.

لما تيجي تدور على معاد فاضي للـ Anmeldung عشان تحجزه، دور في برلين كلها لأنه صعب جداً تحدد مكتب معين أو Bürgeramt معين وتلاقي معاد فيه. ف اللي أنا عملته إني دخلت على اللينك ده واللي من خلاله بتقدر تشوف كل المواعيد الفاضية في كل المكاتب في برلين في يوم محدد وساعتها إختار معاد بسرعة وإكتب بياناتك والإيميل بتاعك وهيجيلك إيميل بالمعاد وحتى لو هتروح مكتب بعيد شويه مش مشكله بس عشان تلحق تكمل إجراءاتك لو مستعجل على التسجيل في البلد: https://goo.gl/jmxrsu

عملت scan لل Anmeldung وبعتهوله قبل ما اخرج من ال Bürgeramt ولقيته إداني معاد 8 مارس وقاللي هتيجي بالباسبور والبلوكارد وال Zusatzblatt اللي معاك دلوقتي وورقة تثبت فيها اشتراكك في تأمين صحي وطبعا ورقة ال Anmeldung.

بعت لل HR بتاع شركتي وطلبت منهم ورقة التامين الصحي ف بعتولي ابليكيشن مليته ومضيته وبعتهولهم تاني ف بعتوه ل TK شركة التامين الصحي. TK بعتت ال confirmation يوم 5 مارس رحت طابعها ورحت الشركة مضيت العقود الأوريچینال ورجعت جمعت كل ورقي ونظمته. طبعا اي ورقع عملتلها scan كنت بطبعها واخدت معايا كل حاجه حرفيا خاصه بملفي وانا بعمل البلوكارد لاول مره والورق اللي جهزته عشان اعمل تجديد لل Zusatzblatt. لدرجة اني اخدت ورقه ال Anmeldung اللی عملته لما دخلت المانیا لاول مره وکمان ورقه Abmeldung اللی عملته قبل ما ارجع مصر وطلع ليها لزمه لانهم يبدو انهم بيعملوا تراك لتحركات الدخول والخروج من البلد.

TK = Techniker Krankenkasse 'الشركة اللي كنت عامل تأميني الصحي معاها لما إشتغلت في ألمانيا لأول مره وقررت إني أكمل معاها أو أبدأ تأمين جديد معاها'

رحت في معادي ودخلت ف اخدوا مني الباسبور والبلوكارد وورقة التامين الصحي وال Zusatzblatt الحالیه وال Anmeldumg. بدأوا يجهزوا في ملفي واستنيت في غرفة الانتظار خمس دقايق تاني وندهولي. دخلت للموظفه ف لقيتها مجهزه كل حاجه ع الكمبيوتر وبصت في البلوكارد لقيتها هتنتهي في ديسمبر 2018 ف قالتلي ده انت كده كمان كام شهر هتجيلنا تاني تجددها وبما ان انت عقدك مفتوح ف احنا احسن حاجه اننا نجددها من دلوقتي ونعمل لك واحده 4 سنين وتستلمها في خلال 6 اسابيع من النهارده. قلتلها تمام جدا.

شافت ورقي وشافت ال Anmeldung وشرحتلها انی جی من مصر بعد ماخرجت من فرانکفرت ف حسبت انا بقالي قد ايه بره وقالتلي اه يعني انت بقالك حوالي 9~10 شهور يعني أقل من 12 شهر قلتلها ايون قالتلي تمام وكملت بقا ابليكيشن تجديد ال Zusatzblatt وطبعتها وبدأت في ابليكيشن البلوكارد وطلبت مني صوره زي الصوره اللي في البلوكارد وطبعت ابليكيشن البلوكارد الجديده ولزقت عليه الصوره ومضيت عليه وكتبتلها الايميل بتاعي علي الابليكيشن بحيث لما تكون جاهزه اروح استلمها وكمان اخدت بصماتي.

سالتني معاك 93 يورو دلوقتي رسوم تجديد البلوكارد؟ قلتلها ينفع ادفع بعدين؟ قالتلي ايوه هطبعلك ورقه فيها رقم حسابنا وتحول عليه المبلغ.

خرجت من عندها معايا ال Zusatzblatt الجديده فيها اسم الشركه اللي هشتغل فيها وفي خلال 6 اسابيع هروح استلم البلوكارد الجديده مدتها 4 سنين لحد 7 مارس 2022 وطبعا هستلم معاها ال Zusatzblatt بتاعتها.

• • • الملحوظة دي تحت المراجعه والتصحيح لما استلم البلوكارد الجديده***
• ملحوظة عن البلوكارد اللي بتطلع من برلين: البلوكارد بتاعتي اللي طلعتها من فرانكفورت مطبوع في ضهرها عنواني اللي كان في فرانكفورت ف هي لما اخدتها مني لزقت عليها ستيكر بيقول انها valid من غیر عنوان لانه يبدو في برلين مبيطبعوش العنوان ع البلوكارد "يا ريت حد ياكدلي المعلومه دي" وقالتلي ان البلوكارد الجديده اللي هتطلعلي مش هيكون عليها عنوان بحيث لو هغير عنواني وللا حاجه مش كل شويه هطبع كارد جديد وابقي ساعتها اروح اعمل Anmeldug وعنواني الجديد يروح للمصالح الحكوميه بشكل ديجيتال ومش لازم يكون مطبوع ع البلوكارد*

لو في حد عنده نفس الحاله بتاعتي ياريت يخللي باله من الكام نقطه دول:

- نظم ورقك وجمعه وقسمه بحيث يكون موجود مترتب وجاهز عند اللزوم.

- احجز دايما معاد اونلاين بدري ع قد ما تقدر.

-اعمل scan لكل ورقه وخللي معاك نسخه سوفت ونسخه مطبوعه.

- اي ورقه اصل صورها.

- اتحرك بين المصالح بالورق كله عشان ممكن تقف ع ورقه وترجع زعلان.

- ابعت ايميلات للجهه اللي بتعمل منها ورقك وحاول تمسك ف حد رد عليك من الايميل بتاعه وتابع معاه هو.

- جهز نفسك واشرح حالتك صح.

- في ال LABO Berlin بيتكلموا الماني بس في منهم بيتكلموا انجليزي برضه ف جهز نفسك انه ع الاقل هتبدا الماني وهم هيسهلوا عليك.

- جهز اسئله تسألهالهم لما تروح ومتبقاش رايح مش فاهم انت عايز ايه.

- خللي معاك صور شخصية ويا ريت تكون زي اللي في البلوكارد.

- خد معاك فلوس احتياطي.

- جمع معلومات على قد ما تقدر "معلومات موثقة بس" ومتحتكمش على تجربه حد الشخصيه في تحديد موقفك، ممكن حالتين يكونوا زي بعض بالمسطره ومعلومه صغيره او فرق صغير يخليهم يبقوا حالتين مختلفين تماماً. ويا ريت تطبع المعلومات الموثقة وتخليها معاك علشان وانت بتتكلم هناك تكون بتقولها عن ثقه ولو موظف مش فاهم او مسقط حاجه، تقدر توريله انت تقصد ايه وتخليه يصحح معلوماته من زمايله لانهم في النهايه بشر وخبراتهم مختلفه وبيتعلموا من بعض.

- لما تجيب معلومة من ويب سايت مثلاً متكتفيش بيها وحاول توصل لايميل الجهه اللي ممكن تجاوب سؤالك وابعتلهم واطبع الايميل وخليه معاه وطبعا لازم تطبع الايميل كله وتوضح مين اللي رد ده. ويا ريت لو بقلم ماركر تعلم على الجزء اللي فيها المعلومه في الايميل.

- متبعتش اي ايميل بالإنجليش، ابعته بالالماني عشان انت بشكل كبير او دايماً هتطبعه وتاخده معاك وتوريه لحد بيقرا الماني. انت هتترجم لنفسك وتفهم انما هو مش هيقعد يترجم حاجه مكتوبه بالإنجليش.

بالتوفيق للجميع واتمني ده يفيد كل واحد مر/بيمر/هيمر بنفس اللي مريت بيه وآسف على الإطالة.